2Sa 23 | NdeIBE | STEP | La ngamazwi okucina kaDavida: “Umbono kaDavida indodana kaJese, umbono womuntu owaphakanyiswa ngoPhezukonke, umuntu owagcotshwa nguNkulunkulu kaJakhobe, umhlabeleli wezingoma ka-Israyeli:

2 Samuel 23

Amazwi okucina kaDavida

1 La ngamazwi okucina kaDavida: “Umbono kaDavida indodana kaJese, umbono womuntu owaphakanyiswa ngoPhezukonke, umuntu owagcotshwa nguNkulunkulu kaJakhobe, umhlabeleli wezingoma ka-Israyeli:

2 “Umoya kaJehova wakhuluma ngami, ilizwi lakhe laliselimini lwami.

3 UNkulunkulu ka-Israyeli wakhuluma, iDwala lika-Israyeli lathi kimi: ‘Lapho umuntu ebusa abantu ngokulunga, lapho ebusa ngokwesaba uNkulunkulu,

4 unjengokukhanya kwekuseni ekuphumeni kwelanga ekuseni okungelamayezi, njengokukhanya emva kokuna kwezulu okumilisa utshani emhlabathini.’

5 “Indlu yami kayifanelanga kuNkulunkulu na? Kanje kenzanga lami isivumelwano esingapheliyo esalungiswayo saqiniswa izigaba zonke na? Kambe kazukuphumelelisa ukusindiswa kwami angiphe konke engikufisayo na?

6 Kodwa abantu ababi bonke bazaphoselwa eceleni njengameva, angabuthwayo ngesandla.

7 Loba ngubani othinta ameva usebenzisa insimbi loba uluthi lomkhonto; ayatshiswa ngomlilo khonapho akhona.”

Amaqhawe kaDavida

8 La ngamabizo amaqhawe kaDavida: UJoshebi-Bhasishebethi umThakemoni wayeyinduna yabaThathu, waphakamisela abantu abangamakhulu aficamibili umkhonto wakhe, ababulalayo ekuhlaseleni kunye.

9 Phansi kwakhe kwakulo-Eleyazari indodana kaDodayi um-Ahohi. Njengomunye wamaqhawe amathathu, wayeloDavida lapho bechothoza amaFilisti ayebuthanele impi ePhasi Damimi. Lapho-ke abantu bako-Israyeli bahlehlela emuva, 10 kodwa yena wajama wawacakazela phansi amaFilisti isandla sakhe saze sadinwa sanamathela enkembeni. Ngalelolanga uJehova waletha ukunqoba okukhulu. Amabutho abuyela ku-Eleyazari ukuyahlubula abafileyo kuphela nje.

11 Phansi kwakhe kwakuloShama indodana ka-Ageye umHarari. Kwathi amaFilisti eseqoqene endaweni eyayilezindumba ezinengi amabutho ako-Israyeli awabalekela. 12 Kodwa uShama wajama phakathi kwensimu. Wayivikela wawacakazela phansi amaFilisti, uJehova waletha ukunqoba okukhulu.

13 Ngesikhathi sokuvuna, abathathu bezinduna ezingamatshumi amathathu baya kuDavida ebhalwini lwase-Adulami, lapho ibutho lamaFilisti lalimise eSigodini seRefayimi.

14 Ngalesosikhathi uDavida wayesenqabeni, lebutho lamaFilisti elilinda inqaba liseBhethilehema. 15 UDavida womela amanzi wasesithi, “O, sengathi kungaba longithathela amanzi okunatha emthonjeni oseduze lesango laseBhethilehema!” 16 Ngakho amaqhawe amathathu lawo adabula phakathi kwamaviyo amaFilisti, akha amanzi emthonjeni eduze lesango laseBhethilehema ahamba lawo kuDavida. Kodwa wala ukuwanatha, esikhundleni salokho wawathela phambi kukaJehova. 17 Wathi, “Akungenzeki, O Jehova, ukuba ngenze lokhu. Akusigazi labantu abahambe befake ukuphila kwabo engozini na?” UDavida kawanathanga. Lezi zaziyizenzo zobuqhawe zalawomabutho amathathu.

18 U-Abhishayi umfowabo kaJowabi indodana kaZeruyiya wayeyinduna yabaThathu labo. Waphakamisela umkhonto wakhe abangamakhulu amathathu, wababulala, ngakho waba lodumo njengabathathu.

19 Kahlonitshwanga kakhulu kulabathathu na? Waba ngumlawuli wabo, lanxa wayengabalwa kanye labo.

20 UBhenaya indodana kaJehoyada wayeliqhawe elilesibindi laseKhabhizeyeli, elenza izenzo zobuqhawe obukhulu. Wabacakazela phansi abantu ababili bamaMowabi ababethenjiwe. Wangena lemgodini kulongqoqwane mhlalokho wabulala isilwane. 21 Njalo wacakazela phansi isiqhwaga som-Gibhithe. Lanxa umGibhithe lowo wayephethe umkhonto, uBhenaya wamhlasela ngenduku. Wawuhluthuna umkhonto esandleni somGibhithe wambulala ngomkhonto wakhe.

22 Lezi zaziyizenzo zobuqhawe zikaBhenaya indodana kaJehoyada; laye futhi wayedume njengamaqhawe amathathu. 23 Wayehlonitshwa kakhulu okwedlula abangamaTshumi Amathathu, kodwa wayengabalwa kanye labaThathu. UDavida wambeka ukuba abe ngumphathi wabalindi bakhe.

24 Phakathi kwabangamatshumi amathathu labo kwakuyilaba: U-Asaheli umfowabo kaJowabi, u-Elihanani indodana kaDodo waseBhethilehema,

25 uShama umHarodi, u-Elika umHarodi,

26 uHelezi umPhalithi, u-Ira indodana ka-Ikheshi wase-Thekowa,

27 u-Abhiyezeri wase-Anathothi, uMebhunayi umHushathi,

28 uZalimoni um-Ahohi, uMaharayi umNethofathi,

29 uHeledi indodana kaBhahana umNethofathi, u-Ithayi indodana kaRibayi waseGibheya koBhenjamini,

30 UBhenaya umPhirathoni, uHidayi wasezindongeni zaseGahashi,

31 u-Abhi-Alibhoni um-Aribhathi, u-Azimavethi umBharihumi,

32 u-Eliyahibha umShahalibhoni, amadodana kaJasheni, uJonathani 33 indodana kaShama umHarari, u-Ahiyami indodana kaSharari umHarari,

34 u-Elifelethi indodana ka-Ahasibhayi umMahakhathi, u-Eliyami indodana ka-Ahithofeli umGiloni,

35 uHeziro umKhameli, uPhaharayi um-Aribhi,

36 u-Igali indodana kaNathani waseZobha, indodana kaHagiri,

37 uZeleki um-Amoni, uNaharayi umBheyerothi, umthwali wezikhali zikaJowabi, indodana kaZeruya,

38 u-Ira um-Ithiri, uGarebi um-Ithiri

39 kanye lo-Uriya umHithi. Bebonke babengamatshumi amathathu lesikhombisa.